Дьокуускай куоракка Ньурба күннэрин чэрчитинэн, Россияҕа Дьиэ кэргэн, Марха улууһа төрүттэмитэ 200 сылларыгар аналлаах Үйэн бэлиэлээх Үөдэйдэр тэрээһиннэрэ ахсынньы 14 күнүгэр "Россия-мин историям" музейга ыытылынна. Үрүҥ үйэн бэлиэлээх, Кылбаа маҥан кырынаастыыр Куо Үөдэй нэһилиэгин сайыҥҥы уонна кыһыҥҥы уобарастара нэһилиэк иистэнньэҥнэрэ тикпит таҥастарын хааман көрдөрдүлэр. Бу күн Наталья Намыны кытта бииргэ толкуйдаан Үрүҥ үйэн брошка оҥоһуллан презентацияланна. Аныгылыы таҥастаах эдэр ыччат мустубут дьоҥҥо көрдөрдүлэр. Ол кэннэ иистэнньэҥ, СӨ култууратын туйгуна, маастар-педагог, Арассыыйа, СӨ худуоһунньуктарын айар союһун чилиэнэ Яна Петровна Ядреева уонна Үөдэйдэр тикпит сахалыы эр дьон, дьахтар бууктаах, оноолоох соннорун кэппит дьахталлар, эр дьоннор уонна эдэр кыргыттар, уолаттар хаамтылар. Семен Гаврильев-Аман Дьаҥсай, Арассыыйа билим академиятын Сибиирдээҕи салаатын Гуманитарнай чинчийии үнүстүтүүтүн билим үлэһитэ Үөдэй нэһилиэгин былыргытын, Сомсуонап Аҕа ууһун дьоҥҥо билиһиннэрдэ. Саха Өрөспүүбүлүкэтин култуураҕа уонна духуобунай сайдыыга миниистирэ Афанасий Иванович Ноев, Ил Түмэн Судаарыстыбаннай мунньах үөрэҕирии кэмитиэтин салайааччыта Антонина Афанасьевна Григорьева уонна Үөдэй нэһилиэгин баһылыга Мария Пудовна Николаева эҕэрдэ тыл эттилэр уонна наҕараадалары туттартаатылар. Тэрээһиҥҥэ ырыаһыт Ирина Николаевна Үөдэй туһунан ырыанан түмүктээтэ. Хаартыскаҕа түһүү кэнниттэн фуршет бэлэмнэннэ.